میر تقی میر

غزل                        

مہر کی تجھ سے توقع تھی ستم گر نکلا

موم سمجھے تھے ترے دل کو سو پتھر نکلا

داغ ہوں رشک محبت سے کہ اتنا بے تاب

کس کی تسکیں کے لیے گھر سے تو باہر نکلا

جیتے جی آہ ترے کوچے سے کوئی نہ پھرا

جو ستم دیدہ رہا جا کے سو مر کر نکلا

دل کی آبادی کی اس حد ھے خرابی کہ نہ پوچھ

جانا جاتا ھے کہ اس راہ سے لشکر نکلا

              

اشک تر قطرہ خوں لخت جگر پارہ دل

ایک سے ایک عدد آنکھ سے بہتر نکلا

ہم نے جانا تھا لکھے گا کوئی حرف اے میر

  پر ترا نامہ تو اک شوق کا دفتر نکلا